АСТАНА. KAZINFORM – Қазақстандық теннисші, 19 жастағы Соня Жиенбаева Унин (Қытай) ITF W100 турнирін сәтті бастады.
Қазақстандық спортшы алғашқы айналымда әлемнің 189-ыншы, осы жарыстың 1-ракеткасы, қытайлық Есинь Маға тап келді.
Қарсыласының фаворит болғанына қарамастан, Соня айқын басымдылық танытты – 6:3, 6:1. Бәсеке 1 сағат 15 минутта аяқталды.
Соня Жиенбаеваның келесі қарсыласы кейін белгілі болады.
Бір апта бұрын С.Жиенбаева осы Униндегі ITF W50 додасында ширек финалға дейін жеткен болатын. Соның нәтижесінде кеше жаңартылған WTA рейтингісінде 1 037-ден 902-орынға көтерілді.
Өткен аптада Кайсери (Түркия) ITF W15 турнирінің ширек финалына дейін жеткен тағы бір қазақстандық, 20 жастағы Асылжан Арыстанбекова да әлемдік рейтингіде 1 047-ден 953-сатыға шықты.
Еске сала кетейік, бұдан бұрын Ролан Гарростан кейін Бублик үшін Штутгарт турниріндегі жағдай қалай өрбуі мүмкін екенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).