АСТАНА. KAZINFORM — Қазақстан ұлттық құрамасының мүшесі, әлемнің 738-ракеткасы Соня Жиенбаева жекелей сында Оренсе (Испания) ITF W75 жарысының ширек финалына жолдама алды.
Қазақстандық теннисші екінші айналымда әлемнің 272-інші, осы турнирдің 6-ракеткасы, марокколық Ясмин Каббаджға қарсы келді.
Бірінші партияда С. Жиенбаева 6:3 есебімен басым түсті.
Екіншісінде марокколық спортшы қарымта қайырды — 6:4.
Үшінші, шешуші сетте Соня жеңісті жұлып алды — 6:2.
Тартысты бәсеке 2 сағат 4 минутқа созылды.
Соня Жиенбаева жартылай финалға шығу үшін әлемнің 230-ракеткасы, ұлыбританиялық Алисия Дьюденимен таласады.
Жүлде қоры 60 мың долларға бағаланған аталмыш додада әлемдік рейтингіде 187-орындағы бельгиялық Грет Миннен 1-ракетка болып тіркелген.
Еске сала кетейік, бұдан бұрын Елена Рыбакинаның Торонто турниріндегі тартысты матчта жеңіске жеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).