Министрдің сөзіне қарағанда, кодекс жобасы сотталғандардың құқықтары мен заңды мүдделерінің қорғалу деңгейін, қылмыстық жазаларды орындаудың тиімділігін едәуір арттыруды, сондай-ақ сотталғандарға тәрбиелік тұрғыдан ықпал етудің сапасы мен дәрежесін жақсартуды көздейді. «Құжатта ең алдымен бас бостандығынан айыру жазасын орындау тетігі жетілдіріледі. Жазаны орындаудың бұрын енгізілген прогрессивтік жүйесі енді қоныс-колониялар мен түрмелерге таралатын болады. Бұл жүйе сотталғандарды ұстауды кезең-кезеңімен ауыстыруды және оларды құқыққа мойынсұнғыштыққа, тәртіпке бағынған жүріс-тұрысқа ынталандырады», - дейді Қалмұханбет Қасымов. Министрдің айтуынша, кодекске сәйкес, бас бостандығынан айырылғандар алдымен өз жазаларын әдеттегі жағдайда өтей бастайды. Алайда, кейіннен жүріс-тұрысына, түрмедегі іс-әрекеттеріне қарай оларды қатал немесе жеңілдетілген жағдайда ұстаумен ауыстыру қарастырылады. «Осыған орай, кодексте сотталғандарды жүріс-тұрысына, тәртібіне қарай жіктеу көзделеді. Мәселен, жазасын өтеп жатқан бас бостандығынан айырылғандар үш топқа бөлінеді. Атап айтқанда, сотталғандар тәртіпті бірлі-жарым бұзатындар, екінші топ - тәртіпті жүйелі түрде бұзатындар және үшінші топ - қасақана тәртіп бұзушылар. Бұл жіктеу тәрбиелік үдерісті барынша сараланған қадаммен жүзеге асыруды қамтамасыз ететін болады. Тіпті, ең ақырында сотталғандардың өзі түрмедегі тағдырын өздері шешетін болады», - дейді Қ. Қасымов.
13:38, 05 Ақпан 2014
Сотталғандар енді түрмедегі тағдырын өздері шешетін болады - ІІМ
АСТАНА. ҚазАқпарат - Жаңа Қылмыстық-атқару кодексінің жобасына сәйкес, сотталғандар түрмедегі тағдырын өздері шешетін болады. Бүгін Парламент Мәжілісінің жалпы отырысында Қылмыстық-атқару кодексі жобасы бойынша баяндама жасаған Ішкі істер министрі Қалмұханбет Қасымов осылай мәлім етті.