Жылыой аудандық әкімдігінің ақпаратына сүйенсек, бірнеше шағын ауданда газ беру тоқтатылған.
«Құлсары қаласындағы «Атырау», «Автожолшылар», «Достық» шағын аудандары мен 2-ауыл, музей маңындағы 3 қабатты 5 үй газдан ажыратылды. Ал, жер астындағы газ құбыры зақымдалып, су кіргендіктен 4 және 6-ауылдағы тұрғын үйлердің жартысына газ қосу мүмкін болмай тұр», - деп хабарлады аудандық әкімдіктен.
Құлсары қаласының басқа аумақтарында, аудандағы барлық елді мекендерде газ штаттық режимде беріліп тұр.
Қазір «Жылыойгаз» ЖШС-нің мамандары кесілген газ желілерін қалпына келтіру жұмысын жүргізуді жоспарлап отыр.
Еске сала кетелік, бұдан бұрын Атырау облысында төтенше жағдай жарияланған еді.
Ал Жылыой ауданынан 35 мыңға жуық тұрғын эвакуацияланды.