Сүйіктісімен жанжалдасып қалған қызылордалық 4-қабаттан секірмек болды
14:10, 16 Қыркүйек 2019
ҚЫЗЫЛОРДА. ҚазАқпарат - Бүгін Қызылордада сүйіктісімен жанжалдасып қалған жігіт көп қабатты үйдің терезесінен секірмек болған, деп хабарлайды ҚазАқпарат тілшісі.
Бұл оқиға таңертең болған. Қызылорда қалалық полиция басқармасы ювеналды полиция бөлімшесінің аға инспекторы Ғали Ережеева жұмысқа бара жатып төртінші қабаттан ер адамның төменге секіруге әрекет жасағанын аңғарды.
Ғалия Ережеева есігі ашық қалған пәтердің терезеде ілініп тұрған мас жігітті сөзге тартып, өз өмірін сақтап қалуға үгіттеді.
«Біраз уақыттан кейін ол өзінің райынан қайтты. Далаға шығып, мән-жайды баяндап берді. Өзінің қызымен жанжалдасып қалғанын айтты. Ол жігіт Сырдария ауданына қарасты Жетікөл ауылының тұрғыны екен», - деді Ғалия Ережеева.
Патрульдік полиция қызметкерлері бұл азаматқа қатысты ҚР Әкімшілік құқық бұзушылық кодексінің 440-бабының 3-бөлігімен әкімшілік хаттама толтырып, наркологиялық орталыққа жеткізді.