Тайланд премьер-министрі Камбоджа басшысымен телефонмен тілдескеннен кейін қызметінен босатылды
АСТАНА. KAZINFORM — Тайланд Конституциялық соты премьер-министр Пэтонгтхан Чинаватты этикалық нормаларды бұзды деп танып, 29 тамыз 2025 жылы қызметінен босатты. Бұл шешім елдегі ең жас премьер-министрдің өкілеттігін аяқтап, Тай саясатында 20 жылдан астам уақыт бойы үстемдік еткен Чинаваттар әулетіне ауыр соққы болды. Бұл туралы Euronews жазды.
Сот 6-ға қарсы 3 дауыс нәтижесінде Пэтонгтханның 15 маусымда Камбоджаның бұрынғы басшысы Хун Сенмен жүргізген телефон әңгімесі ұлттық мүддеге қайшы болды деген қорытындыға келді. Бұл әңгіме көп ұзамай Камбоджа мен Тайланд арасында болған шекара қақтығысына дейін жарияланып, қоғамда наразылық тудырды.
Әңгіме мазмұны мен сын
Аудиожазбада Пэтонгтхан шекарадағы шиеленіске қатысты сөйлесіп, Хун Сенді «аға» деп атағаны, ал бір тай армия генералын «қарсылас» деп сипаттағаны естіледі. Бұл оның ұлттық қауіпсіздікке нұқсан келтірді деген айыптауларға себеп болды.
39 жастағы Пэтонгтхан өзін қорғап, бұл сөйлеу мәнері — келіссөз тактикасы болғанын және шиеленісті төмендетуді көздегенін айтты. Ол кешірім сұрап, ұлттық қауіпсіздікке зиян келтірмегенін мәлімдеді.
Сот шешімі
Сот оның ниеті Тайландтың ұлттық мүддесін қорғауға бағытталғанын, ал әрекеттері ауыр дағдарыстың алдын алуға тырысқанын мойындады. Алайда, судьялардың көпшілігі оның әрекеті этикалық нормаларға қайшы деп таныды.
Пэтонгтхан Чинават сот шешімін қабылдайтынын, бірақ өз айыпсыздығын және адамдардың өмірін сақтап қалуды көздегенін айтты.
Телефон әңгімесінің жариялануы
Телефон әңгімесінің аудиожазбасын Камбоджа экс-премьері Хун Сен өзі желіге жариялаған. Бұл оқиға Тайланд пен Камбоджа арасында шекаралық шиеленістің өршуі аясында болған. Мамырда Тайландпен шекарадағы дау аймақта Камбоджа сарбазы қаза тапқаннан кейін, маусым айында екі ел арасында бес күндік қарулы қақтығыс болып, ондаған адам қаза тауып, 260 мыңнан астам тұрғын үйлерін тастап кеткен.
Чинават әулетіне соққы
Пэтонгтхан — кәсіпкер әрі 2001–2006 жылдары премьер болған Таксин Чинаваттың қызы. Таксин өз кезінде ұлттық мүддеден гөрі жеке пайдасын алға қойғаны үшін сынға ұшыраған. Сондай-ақ, оның Хун Сенмен жылы қарым-қатынаста болғаны белгілі.
Сот шешімі Таксин Чинават үшін де соққы болды. Ол 2006 жылы әскери төңкеріспен биліктен кетсе де, Тайланд саясатында ықпалды тұлға болып қала берді.
Еске сала кетейік, бұған дейін Тайланд кейбір провинциялардағы Камбоджамен шекараны жапты.