Тәжікстан Қытай азаматтары үшін визасыз режим енгізбек

АСТАНА. KAZINFORM – Бұл туралы баспасөз мәслихатында Тәжікстанның Туризмді дамыту комитетінің төрағасы Джамшед Джумахонзода мәлімдеді, деп хабарлайды Kazinform меншікті тілшісі.

Оның атап өтуінше, бұл мәселе қазіргі уақытта қарастырылып жатыр. Оң шешім елдегі туризм индустриясының дамуына, сондай-ақ жарнамалық және ақпараттық жұмыстардың артуына ықпал етеді. 

- Тәжікстан үшін негізгі туризм нарықтары – араб елдері, Англия, Германия, Франция, Ресей, Қытай және Оңтүстік Корея, бұл елдердің азаматтары демалыс пен саяхатқа көбірек қызығушылық танытып отыр, - деді Джумахонзода.

Бұған дейін хабарлағанымыздай, 2025 жылы Тәжікстанға 1,7 миллионнан астам турист келген. Бұл көрсеткіш өткен жылмен салыстырғанда шамамен 25 пайызға жоғары.

Тәжікстанға барған қазақстандық туристер саны 37 мыңнан асады.