ОРАЛ. ҚазАқпарат – Теміртау қаласында жоғалып кеткен жасөспірім қыз Батыс Қазақстан облысынан табылды, деп хабарлайды ҚазАқпарат тілшісі.
БҚО полиция департаментінің баспасөз қызметі мәлім еткеніндей, Бәйтерек ауданының тәртіп сақшылары ата- анасымен керісіп, кетіп қалған 2005 жылғы қызды анықтады.
Қыз Оралға Теміртаудан автокөлікке жолаушы ретінде мініп, жеткен.
Полицейлер Теміртаудағы әріптестерімен хабарласып, қыздың бір аптадай уақыт бұрын үйінен кетіп қалып, іздестіріліп жатқанын білді. Ата-анасына да қыздарының аман-сау, Оралдағы қиын жағдайға тап болған балаларға арналған бейімдеу орталығында екендігін жеткізді.
Енді БҚО полиция департаменті қызметкерлерінің ықпал етуімен жасөспірім қыз Теміртаудағы ата-анасының қолына тапсырылатын болады.
Еске сала кетейік, бұдан бұрын Оралда түн ішінде жалған нөмірмен жүрген жүргізушінің ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).