НҰР-СҰЛТАН. ҚазАқпарат - Қазақстандық Александр Бублик Қытайдағы Чэнду турнирінің жартылай финалына шықты, деп хабарлайды ҚазАқпарат тілшісі.
Дүниежүзілік рейтингте 71-орында тұрған А.Бублик ширек финалда осы жарыстың төртінші, әлемнің 26-ракеткасы, болгариялық Григор Димитровпен күш сынасты.
Қазақстандық теннисші биыл 22-ге толса, тәжірибелі қарсыласы 28-де еді.
Бірінші партияда Г.Димитров басымдық танытты - 7:5.
Екінші сетте тай-брейкте Бубликтің бағы жанды - 7:6 (11:9).
Үшінші, шешуші партияда брейк жасаған Бублик алға кетті - 3:0. Дегенмен қарсыласы да қарап қалмай, таразы басын теңестірді. Ақыры тай-брейкке тірелген матчта қазақстандық теннисші жеңіске жетті - 7:6 (7:3).
Тартысты бәсеке 2 сағат 30 минутқа созылды.
А.Бублик жүлде қоры 1,2 млн АҚШ долларынан асатын турнирдің финалына шығу үшін әлемнің 62-ракеткасы, португалиялық Жоау Соуза немесе рейтингте 111-орындағы оңтүстікафрикалық Ллойд Джордж Харристің біреуімен таласады.
Еске сала кетейік, бұдан бұрын Зарина Дияс Бейжіңнің іріктеу сайысын сәтті бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).