НҰР-СҰЛТАН. ҚазАқпарат - Қазақстанның бірінші, әлемнің 31-ракеткасы Александр Бублик Доха ATP 250 турнирінің ширек финалына шыға алмады, деп хабарлайды ҚазАқпарат тілшісі.
Қазақстандық теннисші жүлде қоры 1 млн АҚШ долларынан асатын доданың екінші айналымында әлемнің 61-ракеткасы, франциялық Артур Риндеркнехпен кездесті.
Бірінші партияда А.Бублик тай-брейкте басымдылық көрсетті - 7:6 (7:5).
Екінші сетте франциялық теннисші әбжілдік танытты - 6:1. Ол үшінші партияда таразы басын өзіне аудара білді - 6:4.
Екі сағаттан астам уақытқа созылған матчта А.Бублик 15 жас жасағанымен, бұл жеңіс үшін жеткіліксіз болды.
Франциялық спортшы жартылай финалға шығу үшін әлемнің 12-інші, осы жарыстың 1-ракеткасы, канадалық Денис Шаповаловпен таласады.
Еске сала кетейік, бұдан бұрын А.Бубликтің Доха турнирінің екінші айналымына шыққанын , Михаил Кукушкиннің Марсельде тартысты матчта жеңіліп қалғанын жазған болатынбыз.
Сондай-ақ Андрей Голубев жұптық сында Доха турнирінің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).