НҰР-СҰЛТАН. ҚазАқпарат – Қазақстанның бірінші, әлемнің 54-ракеткасы Александр Бублик Аустриядағы Кицбюэль ATP турнирінің екінші айналымына шыға алмады, деп хабарлайды ҚазАқпарат тілшісі.
Қазақстандық теннисші алғашқы айналымда дүниежүзілік рейтингте 118-орында тұрған, жарысқа іріктеу сайыстарынан кейін қосылған германиялық Янник Ханфманмен кездесті.
А.Бублик 1 сағат 13 минутқа созылған бәсекеде 5:7, 2:6 есебімен жеңіліс тапты. Бұдан бұрын ол АҚШ-тың ашық чемпионатында да бастапқы кездесуінде-ақ жеңіліп қалған болатын.
Я.Ханфманн жүлде қоры 400 мың АҚШ долларынан асатын доданың ширек финалына шығу үшін әлемнің 24-інші, осы турнирдің 4-ракеткасы, сербиялық Душан Лайовичпен таласады.
Кицбюэль турнирі 13 қыркүйекте мәреге жетеді.
Тағы бір қазақстандық, рейтингте 165-сатыдағы Дмитрий Попко Чехиядағы Простеёв челленджер жарысында бақ сынауда. Ол бірінші айналымда әлемнің 149-ракеткасы, германиялық Янник Маденді 3:6, 6:4, 6:1 есебімен ұтты. Д.Попко бүгін әлемнің 87-ракеткасы, италиялық Стефано Травальяны жеңе алса, ширек финалға шығады.
Еске сала кетейік, бұдан бұрын Зарина Диястың Ыстанбұл турнирінде жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).