НҰР-СҰЛТАН. ҚазАқпарат - Қазақстандық теннисші Монтеррей (Мексика) челленджер турнирінің финалына шықты, деп хабарлайды ҚазАқпарат тілшісі.
Дүниежүзілік рейтингте 120-орында тұрған қазақстандық спортшы жартылай финалда әлемнің 93-ракеткасы, америкалық Теннис Сандгренмен кездесті.
Осы турнирдің 1-ракеткасы болып тіркелген америкалық алғашқы сетте брейктер жасап, 6:2 есебімен жеңіске жетті.
Екінші партияда А.Бублик дәл сондай есеппен есе қайырды.
Үшінші, шешуші сетте есеп 3:3 болған мезетте Сандгрен брейкпен алға шықты. Ол матчқа доп бергенде, Бублик қайыра брейк жасай білді. Матч тағдыры тай-брейкте шешіліп, онда қазақстандық теннисші 7:5 есебімен жеңіске жетті.
Тартысты бәсеке 1 сағат 39 минутқа созылды.
Бублик дәл осы Сандгренді Майамидегі мастерс турнирінде де ұтқан болатын.
Бублик Монтеррей финалында әлемнің 309-ракеткасы, эквадорлық Эмилио Гомеспен чемпиондық атақты сарапқа салады.
Еске сала кетейік, бұдан бұрын Бубликтің Монтеррей турнирінің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).