НҰР-СҰЛТАН. ҚазАқпарат – Қазақстандық Денис Евсеев «Дәулет» теннис орталығында өтіп жатқан ITF World Tennis Tour турнирінің жартылай финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткендей, жарыстың екінші ракеткасы болып тіркелген Денис Евсеев ширек финалда Беларусь өкілі Иван Лютаревичпен кездесті.
Қазақстандық теннисші қарсыласын 6:2, 6:2 есебімен тізе бүктірді.
Д.Евсеев финалға шығу үшін чехиялық Давид Полякпен таласады.
Тағы бір қазақстандық, Ақтау қаласының түлегі Бейбіт Жукаев ширек финалда әлемнің 273-інші, осы доданың 1-ракеткасы, ресейлік Евгений Карловскиймен күш сынасты.
Бірінші партияда брейк жасаған Бейбіт басымдылық танытты – 6:3. Екінші партия барысында қарсыластар брейк алмасты. Дегенмен 12-геймде Е.Карловский тағы бір брейк жасап кетті – 7:5. Ол шешуші, үшінші сетте де ойын тізгінін уысынан шығарған жоқ – 6:3.
Б.Жукаев жартылай финалға шыға алмағанымен, мүмкіндігінің мол екендігін көрсетті.
Еске сала кетейік, бұдан бұрын елорда турнирінде Жібек Құламбаеваның жартылай финалға шыға алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).