НҰР-СҰЛТАН. ҚазАқпарат - Қазақстанның бірінші, әлемнің 45-ракеткасы Михаил Кукушкин Лос Кабос (Мексика) ATP турнирінің ширек финалына шықты, деп хабарлайды ҚазАқпарат тілшісі.
М.Кукушкин екінші айналымда әлемнің 58-ракеткасы, ұлыбританиялық Кэмерон Норримен кездесті.
Бірінші партияда есеп 4:4 болған мезетте ұлыбританиялық теннисші брейк жасап, алға шықты. Дегенмен ол сетке доп бергенде, Кукушкин сәтті ойнай білді. Сөйтіп ол қатарынан үш геймді алды - 7:5.
Екінші сетте есеп 4:4 болғанда, Норри тағы брейк жасады. Дегенмен Кукушкин де есесін жібермей, таразы басын қайта теңестірді - 5:5. Ақыры ол матчты тағы бір брейкпен түйіндей алды - 7:5.
Бәсеке 1 сағат 35 минутқа созылды.
М.Кукушкин жартылай финалға шығу үшін әлемнің 27-ракеткасы, аргентиналық Диего Шварцманмен таласады.
Еске сала кетейік, бұдан бұрын М.Кукушкиннің Лос Кабос турнирінің екінші айналымына шыққанын, ал Зарина Диястың Вашингтон жарысын сәтті бастағанын жазған болатынбыз.
Зарина екінші айналымда украиналық Леся Цуренкомен ойнайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).