НҰР-СҰЛТАН. ҚазАқпарат - Михаил Кукушкин мен Елена Рыбакина 'Ролан Гаррос' турнирінің екінші айналымына өте алмады, деп хабарлайды ҚазАқпарат тілшісі.
Қазақстанның бірінші, әлемнің 51-ракеткасы М.Кукушкин рейтингте 55-орында тұрған словакиялық Мартин Клижанмен кездесті.
Алғашқы екі партияда қазақстандық теннисші 6:3, 7:5 есебімен жеңіске жетті. Осыдан кейін бір сетті алса, жетіп жатыр еді. Алайда ойын тізгінін қолына алған словакиялық теннисші 6:4, 6:2 және 6:3 есебімен матчты өз пайдасына шешті.
Тартысты бәсеке 3 сағат 50 минутқа созылды.
М.Клижан екінші айналымда әлемнің 26-ракеткасы, франциялық Лукас Пуильмен кортқа шығады.
Әйелдер арасында рейтингте 141-орында тұрған Елена Рыбакина да жарыс жолынан шығып қалды. Ол әлемнің 42-ракеткасы, чехиялық Катержина Синяковаға 6:7 (5:7), 1:6 есебімен есе жіберді.
Осылайша жекелей сында "Ролан Гаррос" турнирінде Қазақстаннан Зарина Дияс пен Александр Бублик қана қалды.
Еске сала кетейік, бұдан бұрын З.Диястың екінші айналымға шыққанын, А.Бубликтің турнирді жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).