НҰР-СҰЛТАН. ҚазАқпарат – Қазақстандықтар Александр Недовесов пен Андрей Голубев жұптық сында Хорватиядағы Сплит челленджер турнирінің финалына шықты, деп хабарлайды ҚазАқпарат тілшісі.
Қазақстандық жұп жартылай финалда чехиялықтар Зденек Колар – Лукаш Росолмен шеберлік байқасты.
Бірінші партияда А.Недовесов пен А.Голубев 6:2 есебімен басым түсті.
Екінші сетте чехиялық жұп дәл сондай есеппен есе қайырды – 6:2.
Тай-брейкте қазақстандықтар жеңісті жұлып алды – 10:6.
Бәсеке 1 сағат 16 минутқа созылды.
Жарыстың 1-ракеткалары А.Недовесов пен А.Голубев финалда Польша өкілдері Шимон Валков – Ян Зелинскимен бас жүлдені сарапқа салады.
Олар жартылай финалда турнирдің 2-ракеткалары, франциялық Альбано Оливетти – аустралиялық Мэтт Ридті 6:4, 6:4 есебімен ұтып кетті.
Еске сала кетейік, бұдан бұрын А.Недовесов пен А.Голубевтің Хорватиядағы турнирдің жартылай финалына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).