НҰР-СҰЛТАН. ҚазАқпарат – Қазақстандық Заңғар Нұрланұлы жасөспірімдер арасында жұптық сында Мажарстан астанасы Будапештте өткен Alfa Tl Cup TE турнирінің жеңімпазы атанды, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, З.Нұрланұлы қытайлық Ли Янхонгпен бірге финалда мажарстандықтар Марсель Меццо – Ботонг Нагиді 6:4, 7:5 есебімен ұтты.
Қазақстанның жас жұлдызы жекелей сында да табысты өнер көрсетті. Заңғар финалда ғана осы жарыстың 2-ракеткасы, чехиялық Мартин Доскошилге 3:6, 3:6 есебімен есе жіберді.
Тағы бір қазақстандық, Ақтау теннис мектебінің түлегі Даниал Рахматуллаев Тбилисиде өткен ITF MZIURI CUP 2021 додасының финалына дейін жетті. Ол соңғы бәсекеде жарысның 4-ракеткасы, Беларусь өкілі Тихон Федоровтан ұтылды – 3:6, 1:6.
Сондай-ақ Қырғызстан астанасы Бішкекте жасөспірімдер арасында ITF J5 Bishkek Open 2 турнирі мәреге жетті. Мұнда қазақстандықтар Арсланбек Айтқұлов пен Александр Черномаз бір апта бұрын жұптық сында чемпион атанған жетістіктерін қайталай алмады. Олар бұл жолы ресейлік Павел Петров – америкалық Максимилиан Вуфлингтен айласын асыра алған жоқ – 1:6, 2:6.
Қыздар арасында Еркежан мен Асылжан Арыстанбековалар финалда тартысты бәсекеде ресейліктер Валерия Ивановская – Серафима Шастовадан жеңіліп қалды – 4:6, 6:7 (1:7).
Еске сала кетейік, бұдан бұрын Ролан Гаррос турнирі басталатынын, Елена Рыбакинаның жеңіспен бастағанын жазған болатынбыз.
Сондай-ақ Жібек Құламбаева Шымкент турнирінің чемпионы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).