НҰР-СҰЛТАН. ҚазАқпарат – Қазақстанның жұптық сындағы бірінші, әлемнің 25-ракеткасы Андрей Голубев Рим мастерс турнирін сәтті бастады, деп хабарлайды ҚазАқпарат тілшісі.
Андрей Голубев аргентиналық Максимо Гонсалеспен бірге бастапқы кездесуін жарыстың 4-ракеткалары, аустралиялық Джон Пирс – словакиялық Филип Полашекпен өткізді.
Бірінші партияда аустралиялық-словакиялық жұп басым түсті – 6:3.
Екіншісінде Голубев пен Гонсалес есе қайырды – 6:3. Сосын супер тай-брейкте жеңісті жұлып алды – 10:8.
Сағат жарымға созылған матчта қазақстандық-аргентиналық жұп 9 брейк-пойнттың біреуін ғана пайдаланды. Қарсыластары 5 эйс, 1 брейкпен көзге түсті.
А. Голубев пен М. Гонсалестің жүлде қоры 5,4 млн еуродан асатын доданың екінші айналымында аустралиялықтар Мэттью Эбден – Макс Перселл немесе грузиялық Николоз Басилашвили – тағы бір қазақстандық Александр Бублик жұптарының қай жеңгенімен кездеседі.
Еске сала кетейік, бұдан бұрын Юлия Путинцеваның Рим турнирінің екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).