АСТАНА. ҚазАқпарат – Әлемнің 256-ракеткасы, қазақстандық Бейбіт Жұқаев Пальмес дель Мар (Пуэрто-Рико) челленджер турнирін жеңіспен бастады, деп хабарлайды ҚазАқпарат тілшісі.
Қазақстандық теннисші алғашқы айналымда әлемнің 242-інші, осы жарыстың 6-ракеткасы, жапониялық Юта Шимизумен шеберлік байқасты.
Бейбіт Жұқаев қарсыласын 6:3, 6:4 есебімен тізе бүктірді.
Бір сағат 20 минутқа созылған бәсеке барысында Бейбіт 5 эйспен бірге 8 брейк-пойнттың үшеуін пайдаланды.
Б.Жұқаев ширек финалға шығу үшін америкалық Эван Чжу немесе норвегиялық Виктор Дурасовичтің біреуімен таласады.
Тағы бір қазақстандық Денис Евсеев тартысты матчта бразилиялық Жоао Лукас Реис Да Сильваға жол берді – 7:5, 4:6, 5:7.
Еске сала кетейік, бұдан бұрын Елена Рыбакинаның ресми түрде әлемнің үшінші ракеткасы атанғанын жазған болатынбыз.
Сондай-ақ Александр Бублик әлемдік рейтингте үздік елулікке қайта кірді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).