АСТАНА. KAZINFORM — Қазақстандық, әлемнің 271-ракеткасы Тимофей Скатов Острава (Чехия) челленджер турнирінің ширек финалына шықты.
Қазақстандық теннисші екінші айналымда әлемнің 216-ракеткасы, испаниялық Даниэль Ринконға қарсы келді.
Тартысты өрбіген бірінші партияда Скатов тай-брейкте есесін жібермеді – 7:6 (7:3).
Екіншісінде испаниялық спортшы есе қайырды – 6:3.
Үшінші, шешуші сетте Тимофей жеңісті жұлып алды – 6:3.
Үш сағаттан астам уақытқа созылған матчта Скатов 1 эйс жасап, 14 брейк-пойнттың төртеуін ғана пайдаланды. Ринкон 11 эйс, 4 брейкпен (9 брейк-пойнт) көзге түсті.
Тимофей Скатов жартылай финалға шығу үшін қос чехиялық, әлемнің 225-ракеткасы Зденек Колар немесе рейтингіде 351-сатыдағы Филип Никодтың біреуімен таласады.
Т.Скатов ATP Live рейтингісінде қазіргі сәтте 255-орынға көтеріліп тұр.
Еске сала кетейік, бұдан бұрын Мадрид мастерс турнирінде Бублик пен Шевченконың кімдермен ойнайтынын жазған болатынбыз.
Сондай-ақ Юлия Путинцева Мадрид мастерс турнирінің екінші айналымына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).