АСТАНА. ҚазАқпарат - Қазақстандық, әлемнің 138-ракеткасы Тимофей Скатов Карлсруэ (Германия) челленджер турнирінің жартылай финалына шықты, деп хабарлайды ҚазАқпарат тілшісі.
Жарыстың алтыншы ракеткасы болып тіркелген қазақстандық теннисші ширек финалда дүниежүзілік рейтингте 440-орында тұрған ливандық Хади Хабибпен шеберлік байқасты.
Бірінші партияда брейк жасаған қазақстандық теннисші сол басымдылығын сақтап қалды - 6:3.
Тимофей екінші сетте де 4:2 есебімен алға кетті. Сосын тағы бір брейк жасап, матчты бітірді - 6:2.
Бір сағат 20 минутқа созылған кездесуде Т.Скатов эйс жасамағанымен, 12 брейк-пойнттың үшеуін пайдалана білді. Қарсыласы 9 эйспен ғана көзге түсті.
Тимофей Скатов финалға шығу үшін әлемнің 145-ракеткасы, чилилік Алехандро Табило немесе рейтингте 166-сатыдағы швейцариялық Леандро Ридльдің қай жеңгенімен таласады.
Еске сала кетейік, бұдан бұрын Елена Рыбакинаның екінші жеңісіне қол жеткізгенін жазған болатынбыз.
Сондай-ақ Александр Недовесов Уимблдонда алғашқы айналымнан аса алмады.
Михаил Кукушкин АҚШ-тағы турнирдің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).