АСТАНА. KAZINFORM – Қазақстандық теннисші, әлемнің 195-ракеткасы Тимофей Скатов Марракеш (Марокко) ATP 250 турнирі іріктеу сайысының финалына шықты.
Қазақстандық теннисші іріктеу сайысының жартылай финалында әлемнің 128-ракеткасы, италиялық Андреа Пеллегриноға тап келді.
Іріктеудің 3-ракеткасы болып тіркелген италиялық теннисші фаворит саналған еді.
Бірінші партияда А.Пеллегрино 6:3 есебімен басым түсті. Алайда екінші сетте Т.Скатов 4:1 есебімен алға шыққан сәтте қарсыласы матчты жалғастырудан бас тартты.
Тимофей Скатов іріктеу сайысының финалында әлемнің 141-ракеткасы, тунистік Моэ Эшаргимен шеберлік байқасады. М.Эшарги рейтингіде 939-сатыдағы марокколық Юнес Лалами-Лааруссиден айласын асырды – 6:4, 7:6 (7:3).
Т.Скатов тунистік теннисшіні жеңсе, негізгі турнирге жолдама алады.
Еске сала кетейік, бұдан бұрын Жібек Құламбаеваның Үндістандағы турнирде жұптық сында үздік шыққанын жазған едік.
Сондай-ақ Жібек Құламбаева Үндістандағы турнирдің абсолютті жеңімпазы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).