АСТАНА. KAZINFORM — Қазақстандық теннисші, әлемнің 163-ракеткасы Тимофей Скатов Эшторил (Португалия) ATP 250 турнирінің екінші айналымына шықты.
Т.Скатов іріктеу сайысының финалында жеңіліп қалғанымен, турнирді ұйымдастырушылар оған тағы бір мүмкіндік берді.
Қазақстандық теннисші алғашқы айналымда әлемнің 98-ракеткасы, нидерландылық Йеспер Де Йонгқа тап келді.
Бірінші партияда нидерландылық теннисші айқын басымдылық танытты – 6:1.
Бұдан кейін Т.Скатов камбэк жасай білді – 6:4, 6:3.
Екі сағат 28 минутқа созылған тартысты бәсекеде Скатов эйс жасамағанымен, 8 брейк-пойнттың бесеуін пайдаға асырды. Йеспер Де Йонг 15 эйс, 5 брейкпен (17 брейк-пойнт) ерекшеленді.
Осылайша, сенсациялық жеңіске қол жеткізген Тимофей Скатов ширек финалға шығу үшін әлемнің 14-ракеткасы, ресейлік Андрей Рублевпен таласады.
Т.Скатов қазіргі кезде ATP Live рейтингісінде 150-орынға көтеріліп тұр.
Еске сала кетейік, бұдан бұрын Юлия Путинцеваның Германиядағы жарыста жергілікті теннисшіні жеңгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).