Трамп Ұлттық қауіпсіздік кеңесінің отырысын өткізуді бұйырды — баспасөз

АСТАНА. KAZINFORM – АҚШ президенті Дональд Трамп Канададағы «үлкен жетілік» саммитінен Вашингтонға ерте оралуды ұйғарып, Ақ үйде Ұлттық қауіпсіздік кеңесінің отырысын өткізуге бұйрық берді, деп хабарлады BBC.

Трамптың Ақ үйдегі жағдай кабинетінде Ұлттық қауіпсіздік кеңесін шұғыл шақыру туралы шешімі туралы бірінші болып Fox News тілшісі X желісінде хабарлады. Көп ұзамай CNN телекомпаниясы дәл осындай ақпаратты Трамп әкімшілігіндегі анонимді әңгімелесушіден алды.

CNN оның дереккөзі Трамптың кеңестің тез арада немесе Канададан оралған соң жиналуын қалайтынын нақтыламағанын қосып өтті.

Ұлттық қауіпсіздік кеңесінің құрамына АҚШ-тың жоғары лауазымды тұлғалары, соның ішінде Мемлекеттік хатшы, Қорғаныс министрі және Ұлттық барлау директоры кіреді.

«G7» саммиті өтіп жатқан Кананаскис қаласында жүрген Би-би-си тілшісі Энтони Зуркер атап өткендей, Трамп ұшып кетер алдында жеті елдің мемлекет басшыларына арналған кешкі асқа қатысуды жоспарлаған, ал екінші жағынан, президент ұшағы бортында Ақ үйдегі кездесуге қатысу үшін барлық қажетті байланыс құралдары бар.

Ақ үйдің баспасөз хатшысы Трамптың Таяу Шығыстағы оқиғаларға байланысты «жетілік» саммитінен мерзімінен бұрын кететінін жариялады.

Еске сала кетсек, Трамп бұған дейін Израиль мен Иран арасында бейбітшілік орнатуға уәде берді.