Түркиядағы алапат өрттен зардап шеккендер арасында Қазақстан азаматтары жоқ - Елшілік

НҰР-СҰЛТАН. ҚазАқпарат – Түркияның Анталья провинциясындағы алапат өрттен қаза тапқандар мен зардап шеккендер арасында Қазақстан азаматтары жоқ, хабарлайды ҚазАқпарат тілшісі.

Бұл туралы Қазақстан Республикасының Түрік Республикасындағы Төтенше және Өкілетті Елшісі Абзал Сапарбекұлы Facebook-тегі парақшасында жазды.

Төтенше және Өкілетті Елші ресми мәлімет бойынша 600 гектардан астам орман отқа оранғанын айтады.

«Өрт шарпыған орманның ауқымы бұдан 3-4 есеге артуы мүмкін. 50-ге жуық шағын ауылдар көшірілген. 7-8 ауыл жанып кеткен. Яғни, түсінетіндерге түрік ағайындар өте қиын жағдайға тап болып отыр. Өкінішке қарай қатты желге байланысты өрт толық бақылауға алынды деу қиын. Тілсіз жау Алания ауданы шекерасына жақындап қалды деген ақпараттар түсуде», - дейді Абзал Сапарбекұлы.