АСТАНА. KAZINFORM – Қазақстанның бірінші, әлемнің 11-ракеткасы, Елена Рыбакина Уимблдон турнирлерінде жеңіс санының пайызы (87,5) жөнінен төртінші орынға көтерілді.
OptaAce X әлеуметтік желісінде мәлім еткеніндей, Е.Рыбакина Уимблдонда әйелдер арасында жекелей сында бұл көрсеткіш бойынша атақты америкалық теннисші, «Үлкен дулыға» жарыстарының 23 дүркін чемпионы Серена Уильямспен теңесті.
Рекорд Энн Хейдон-Джонсқа (92,3 пайыз) тиесілі. Одан кейінгі орындарда Штеффи Граф (91,4 пайыз) пен Мартина Навратилова (89,6 пайыз) орналасқан.
Қазақстандық теннисші Уимблдонға алғаш қатысқан 2021 жылы төртінші айналымға дейін жетсе, одан кейін чемпион атанды. 2023 жылы ширек, өткен жылы жартылай финалда өнер көрсетті.
Биыл Е.Рыбакина үшінші айналымда әлемнің 22-ракеткасы, даниялық Клара Таусонмен шеберлік таластырады.
Еске сала кетейік, бұдан бұрын Анна Данилинаның Уимблдон турнирін жеңіспен бастағанын жазған едік.
Елена Рыбакина үшінші айналымға жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).