Ұлыбритания Газаны қалпына келтіру жөнінде халықаралық конференция өткізеді

АСТАНА. KAZINFORM — Ұлыбритания Газа секторын қайта құру мәселесін талқылау үшін бизнес өкілдерімен халықаралық конференция өткізеді.

Report агенттігінің хабарлауынша, бұл туралы Ұлыбритания премьер-министрі Кейр Стармер кеңсесінің мәлімдемесінде айтылған.

— Ұлыбритания анклавты қалпына келтіру және қайта құру бойынша үш күндік конференция өткізу арқылы Газадағы бейбітшілік жоспарының келесі кезеңінде жетекші рөл атқарады. Конференцияға Германия, Италия, Сауд Арабиясы, Иордания және Палестина ұлттық билігі сияқты бірнеше халықаралық серіктестер, сондай-ақ жеке сектор мен халықаралық дамуды қаржыландыру бағдарламаларының, соның ішінде Еуропалық қайта құру және даму банкі мен Дүниежүзілік банк өкілдері қатысады, — делінген хабарламада.

Стармер кеңсесі іс-шараны соғыстан кейінгі Газаны реттеуге арналатынын айтты.

— Сонымен қатар талқылауларда Палестина ұлттық билігінің трансформациясын қолдауға бағытталған күш те қозғалады. Қайта құру процесін палестиналықтар басқарады, ал радикалды ХАМАС қозғалысы Газаның болашақтағы басқаруында ешқандай рөл атқармайды, — деп қосты Стармер кеңсесі.

Бұған қоса, британ билігі осы аптада Газадағы қақтығысты шешуге бағытталған жұмыс аясында Ұлыбритания Сыртқы істер министрі Иветт Купер Лондонда Иорданияның тақ мұрагер ханзадасы Хусейн бин Абдулламен кездесетінін хабарлады.

Еске сала кетейік, Палестинаны мемлекет ретінде мойындаған елдердің қатарында Ұлыбритания да бар.