Құжатқа бейсенбі күні Еуропалық саяси қоғамдастық саммитіне қатысу үшін Ирландияға барған Ұлыбритания премьер-министрі Энди Бернхэм мен Әзербайжан президенті Ильхам Әлиев қол қойды.
Декларацияға сәйкес, екі ел аймақтық бейбітшілік пен тұрақтылықты қолдау, сондай-ақ ортақ қауіп-қатерлердің алдын алу, олардың жолын кесу және оларға жауап беру мүмкіндіктерін арттыру мақсатында қорғаныс пен қауіпсіздік саласындағы ынтымақтастықты ұзақ мерзімді негізде нығайтуға ниетті.
– Тараптар жоғары деңгейдегі байланыстардың тұрақты қарқынын сақтауға және өзара мүдделі екіжақты, аймақтық әрі халықаралық мәселелер бойынша үйлестіруді тереңдетуге міндеттенеді, – делінген құжатта.
Декларацияда тараптар әскери дайындық, әлеуетті арттыру және өзара іс-қимыл үйлесімділігін жетілдіру бағыттарына басымдық бере отырып, қорғаныс саласындағы ынтымақтастықты дамытатыны атап өтілген. Сондай-ақ ортақ мүдделерге сай бағыттар бойынша бірлескен бастамаларды қоса алғанда, қорғаныс өнеркәсібі саласындағы әріптестікті кеңейту мүмкіндіктері қарастырылады.
– Олар өзгеріп жатқан қауіпсіздік жағдайлары мен қатерлерге жауап ретінде қауіпсіздік саласындағы басым бағыттардың кең ауқымы бойынша ынтымақтастықты нығайтады, – делінген құжатта.
Екі елдің басшылары екіжақты сауда мен инвестициялық байланыстарды кеңейтіп, тереңдетуге, сондай-ақ тұрақты, баршаға ортақ және әртараптандырылған экономикалық өсуді ынталандыруға ниетті екенін білдірді.
Тараптар жаңартылатын энергия көздері, инфрақұрылым және қызмет көрсету салаларын қоса алғанда, басым секторлар бойынша ұзақ мерзімді коммерциялық әріптестікті дамыту, білім мен тәжірибе алмасу және өзара байланысты нығайту арқылы экономика, сауда және инвестиция салаларындағы ынтымақтастықты күшейтеді.
– Қатысушылар аймақтық және халықаралық өзара байланыстың маңызын атап өтіп, трансшекаралық сауда мен инвестицияға жағдай жасайтын көлік, логистика және инфрақұрылым жобаларымен қатар, Орта дәлізді дамытуға қолдау көрсетеді, – делінген құжатта.
Декларацияға сәйкес, тараптар сауда-экономикалық ынтымақтастық пен техникалық диалогты дамыту тетігі ретінде Сауда-экономикалық ынтымақтастық жөніндегі бірлескен үкіметаралық комиссияның рөліне ерекше мән берген.
– Олар бұл комиссияны инвестиция, экономиканы әртараптандыру, Орта дәлізді дамыту және энергетика саласындағы ынтымақтастық бойынша бірлескен бастамаларды ілгерілетудің негізгі алаңы ретінде пайдаланады, – делінген құжатта.
Сондай-ақ екі ел білім беру және кәсіби дағдыларды дамыту саласындағы ынтымақтастықты тереңдетеді. Бұл бағыт жоғары білімді, кәсіптік білім мен даярлықты, цифрлық және техникалық дағдыларды, сондай-ақ еңбек нарығы мен мемлекеттік басқару саласындағы өзгермелі қажеттіліктерге сай басшылар мен мемлекеттік сектор қызметкерлерін оқытуды қамтиды.
– Қатысушылар осы декларацияның үш негізгі бағыты бойынша қол жеткізілген нәтижелерді бағалау, болашақтағы ынтымақтастықтың басымдықтарын айқындау және нақты кейінгі қадамдарды келісу үшін Стратегиялық әріптестік жөніндегі кездесуді жыл сайын өткізу туралы уағдаласты, – делінген құжатта.
Еске сала кетсек, бұған дейін АҚШ, Әзербайжан және Армения TRIPP жобасы бойынша техникалық топтар құрғанын жаздық.
Оның алдында Әзербайжан, Армения және АҚШ бейбіт келісімдерді жүзеге асыруға бейілді екенін растағанын хабарлаған едік.