Лондон жаңа салым инфрақұрылым, энергетика және жоғары технологиялық салалардың дамуын жеделдетуге көмектесіп, сондай-ақ мыңдаған жұмыс орнын ашады деп санайды.
Келісім туралы Ұлыбритания премьер-министрі Кир Стармер мен Жапония премьер-министрі Санаэ Такаитидің кездесуінен кейін белгілі болды.
Жапондық компаниялар Біріккен Корольдіктің инфрақұрылымдық жобалары мен қаржы секторына 12 млрд доллардан астам инвестиция салуды жоспарлап отыр. Тағы шамамен 12 млрд доллар теңіздегі жел энергетикасын дамытуға бағытталуы мүмкін.
Стармер қол жеткізілген келісімдерді екі ел арасындағы экономикалық ынтымақтастықтың жаңа тарауының бастамасы деп атады.
Жобаларға қатысуға дайын компаниялар қатарында Mitsubishi Estate, Mitsui Fudosan және Nomura Real Estate бар.
Лондон мен Токио сондай-ақ Италия қатысып жатқан GCAP озық жойғыш ұшақтар бірлескен бағдарламасына қатысты міндеттемелерін растады.
Бұдан басқа, британдық Rolls-Royce компаниясы мен Жапонияның атом энергиясы жөніндегі агенттігі келесі буын ядролық технологияларын әзірлеу туралы ынтымақтастық орнатуға келісті. Серіктестік екі ел арасындағы ғылыми зерттеулер, бағдарламалық шешімдер және өндірістік мүмкіндіктерді біріктіруді көздейді.
Жапония премьер-министрі Ұлыбританияның Токио үшін ең маңызды халықаралық серіктестердің бірі болып қала беретінін атап өтті.
Келісім британдық экономика өсімнің баяулауына тап болған кезеңде жарияланды. Бірінші тоқсанда ЖІӨ-нің 0,6%-ға өсуіне қарамастан, сарапшылар алдағы айларда қалыпты өсімді күтіп отыр. Инфляциялық қысым мен әлемдік нарықтардағы тұрақсыздық қосымша тәуекелдер болып қала береді.
Осыған дейін Жапония Қазақстанда ірі инвестор елдердің ондығына кіретіні хабарланды.