АСТАНА. KAZINFORM — Теннистен Нью-Йорк қаласында өтіп жатқан АҚШ ашық чемпионатында алғашқы сенсация тіркелді.
«Үлкен дулыға» турнирлерінің 24 дүркін чемпионы, әлемнің 5-ракеткасы, 39 жастағы сербиялық Новак Джокович бастапқы айналымда рейтингіде 49-орындағы аргентиналық Мариано Навонеге есе жіберді — 6:7 (5:7), 7:5, 6:4, 2:6, 1:6.
Аса тартысты өткен матч 4 сағат 40 минутқа созылды. Бұл Новак Джоковичтің спорттық жолында алғашқы айналымда ең ұзаққа созылған бәсеке еді. Сонымен қатар сербиялық теннисші соңғы 20 жылда бірінші рет «Үлкен дулыға» жарысының екінші айналымына шыға алмады.
Новак Джокович 2006 жылы Аустралия ашық чемпионатының алғашқы айналымында америкалық Пол Голдстинге жол берген еді. Сол сәтсіздік араға жиырма жыл салып, бүгін қайталанды.
Еске сала кетейік, бұдан бұрын АҚШ ашық чемпионатында Александр Шевченконың бес сеттік матчта жеңіліп қалғанын жазған едік.
АҚШ ашық чемпионатында Александр Бублик алғашқы жеңісіне қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).