Ұлттық экономика министрі республикалық бюджеттің кіріс сомасын атады
АСТАНА. KAZINFORM – Биыл республикалық бюджеттің кірістері 14,1 трлн теңге көлемінде бағаланады, бұл бекітілген жоспардан 2 трлн теңгеге төмен. Оның себебін Премьер-Министрдің орынбасары – Ұлттық экономика министрі Нұрлан Байбазаров түсіндірді.
«2024–2028 жылдарға арналған әлеуметтік-экономикалық даму болжамы шеңберінде 2024 жылға арналған республикалық бюджет пен Ұлттық қор параметрлерінің нақтыланған болжамы енгізіледі. 2024 жылға арналған макро көрсеткіштер болжамын қалыптастырудың бастапқы параметрлері ел экономикасының ағымдағы дамуына сәйкес келеді. Биыл 10 айдың қорытындысы бойынша мұнайдың орташа бағасы барреліне 80,5 АҚШ доллары деңгейінде қалыптасты, орташа жылдық теңге бағамы АҚШ доллары үшін 461,4 теңге болды», - деді Нұрлан Байбазаров Мәжілістің жалпы отырысында.
Министрдің айтуынша, 2024 жылға арналған бастапқы параметрлер бұрынғы деңгейде, мұнай бағасы – барреліне 80 АҚШ доллары, есеп айырысу бағамы – 460 АҚШ доллары, инфляция 6-8 пайыз деңгейінде сақталды.
«2024 жылға арналған макро көрсеткіштердің параметрлері 2024-2028 жылдарға арналған мақұлданған болжам шеңберінде сақталды. Республикалық бюджеттің кірістері 14,1 трлн теңге көлемінде бағаланады, бұл бекітілген жоспардан 2 трлн теңгеге төмен», - дейді ол.
Одан әрі Ұлттық экономика министрі кірістер бойынша болжамды төмендеу себебін түсіндірді.
– 2025 жылға болашақ кеңейту жобасын іске қосуды кейінге қалдыруға байланысты мұнай өндіру көлемінің 5,1 млн тоннаға азаюы;
– Биыл қосымша құн салығын қайтару сомасының ұлғаюы;
– сыртқы сауда айналымының төмендеуі.
«Негізгі төмендеу корпоративтік табыс салығына, қосылған құн салығына және мұнайға экспорттық кедендік баж салығына тиесілі. Бұл салықтар бюджетке түсетін салықтық түсімдердің басым бөлігін құрайды, яғни қосылған құн салығының үлесі 45,9 пайыз, корпоративтік табыс салығы 29 пайыз және мұнайға экспорттық кедендік баж салығы 10,8 пайыз. Қосылған құн салығы бойынша бекітілген жоспарға қарағанда түсімдердің 1,5 трлн теңгеге төмендеуі, бюджеттен қосылған құн салығын қайтаруды 595 млрд теңгеге ұлғаюы, импорт көлемінің 8,3%-ға төмендейтіні болжанды. Мұнайға экспорттық кедендік баж бойынша мұнай өндіруді 95,4 млн тоннадан 90,3 млн тоннаға дейін азаю себебінен түсімнің 266 млрд теңгеге төмендеуі болжанып отыр», - дейді ол.
Айта кетсек, 21 қарашада Сенат республикалық бюджет туралы заңды Мәжіліске қайтарды.