АСТАНА. KAZINFORM - Таиланд астанасы Бангкок қаласында өтіп жатқан бокстан Олимпиадаға іріктеу турнирін бүгін, 27 мамырда Валентина Хальзова (75 келі) жеңіспен бастады.
Қазақстандық спортшы алғашқы айналымда украиналық Каролина Махноны сенімді жеңді. Осылайша ол турнирдің екінші кезеңіне өтті.
Айта кетсек, қазірге дейін ел құрамасынан 25 мамырда Назым Қызайбай (50 келі) Николь Дурикованы жеңіп, жарыстың келесі кезеңіне шықты.
Одан кейін Римма Волосенко (60 келі) германиялық Фелиситас Мария Ганглбайерді тізе бүктірді.
Сондай-ақ, әйелдер құрамасында енді Ұлжан Сәрсенбек (54 келі), Наталья Богданова (66 келі) сынға түседі.
Ерлер құрамасынан Мұхамедсабыр Базарбайұлы (63.5 келі) 1/32 финалда филиппиндік Кристиан Питт Лорентті қапы қалдырды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.