АСТАНА. KAZINFORM — Қытайдың Цзянмэнь қаласында волейболдан 21 жасқа дейінгілер арасында өтіп жатқан ХХІІІ әлем чемпионатында Қазақстан құрамасы соңғы кездесуін өткізді.
Сергей Трикоз жаттықтыратын қазақстандық жастар 13-орын үшін матчта Мысыр командасымен сынға түсті.
Алғашқы екі партияда мысырлықтар басымдылық танытты — 25:22, 25:19.
Үшінші сетте де олар 13:7 есебімен алға кетті. Дегенмен қазақстандықтар таразы басын теңестіре білді. Әйтсе де тартысты сет соңында сәттілік қарсылас жағында болды — 30:28.
Қорытынды есеп — 3:0, Мысырдың пайдасында.
Осылайша, әлем чемпионатына алғаш рет қатысқан Қазақстан жастар құрамасы 14-орынға табан тіреді.
Еске сала кетейік, бұдан бұрын волейболдан әлем чемпионатында Қазақстан жастары Аргентинадан айласын асырғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).