АСТАНА. KAZINFORM – Петропавл қаласында волейболдан әйелдердің ұлттық лига командалары арасында Қазақстан чемпионаты төртінші үлкен турының ойындары өтіп жатыр.
Төртінші турдың екінші күні орталық матчта «Қуаныш» (СҚО) пен «Өскемен» командалары кездесті.
Осыған дейін Юрий Панченко жаттықтыратын солтүстікқазақстандық клуб 66 ұпаймен екінші орында тұрса, өскемендіктер (55 ұпай) үшінші сатыда еді.
Бұл жолы сәтті ойнаған сербиялық маман Владимир Васовичтің шәкірттері 3:0 (25:21, 25:20, 25:21) есебімен жеңіске жетті.
Талдықорғанның «Жетісуы» (бас бапкері Марко Гршич) қамшы салдырмай, 76 ұпаймен бұрынғыша көш бастап келеді. Талдықорғандықтар алдымен «Астананы» 3:0 (25:12, 25:17, 25:19) есебімен ұтса, кеше «Қарағандыны» қапы қалдырды – 3:0 (25:21, 25:20, 25:18).
Төртінші тур ойындары 23 наурызда аяқталады.
Еске сала кетейік, бұдан бұрын «Жетісу» клубының чемпионат басталғаннан бері ұпайдан шашау шығармай келе жатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).