ТАЛДЫҚОРҒАН. KAZINFORM – Талдықорған қаласында волейболдан ерлердің ұлттық лига командалары арасында Қазақстан чемпионатының үшінші турында орталық кездесу «Жайық» пен «Ақтөбе» арасында өтті.
Виктор Козик шәкірттері осыған дейін қатарынан 15 ойынында жеңіске жеткен еді.
Оралдықтар 21 қараша күні бірінші турда Сергей Трикоз жаттықтыратын ақтөбеліктерге 2:3 есебімен есе жіберген еді. Оның алдында Қазақстан кубогының финалында да «Ақтөбеден» ұтылып қалған болатын.
Бұл жолы бірінші партияда ақтөбеліктер 25:17 есебімен басым түссе, оралдықтар екіншісінде есе қайырды – 25:18.
«Жайық» сапында ойнайтын ресейлік Михаил Моров жарақат алғаннан кейін оның орнына Орал волейболының түлегі Айдын Әділбеков шықты. Басқалай да алмасулар болды. Бірақ бүгін ақтөбеліктер дес бермеді – 25:19, 25:22. Қорытынды есеп – 3:1.
Осы ойыннан кейін «Жайық» 46 ұпаймен бірінші орында қалғанмен, «Ақтөбе» (38 ұпай) бір табан жақындай түсті.
Еске сала кетейік, бұдан бұрын «Атыраудың» ел чемпионы «Таразды» ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).