ПЕТРОПАВЛ. KAZINFORM – Петропавл қаласында волейболдан әйелдердің ұлттық лига командалары арасында өтіп жатқан Қазақстан чемпионатының үшінші турында «Берел» (Өскемен) әзірге ешкімге дес бермей келеді.
Ришат Гилязутдинов жаттықтыратын өскемендіктер жексенбі күні «Ару-Астана» командасынан 3:0 (25:19, 25:18, 25:16) есебімен басым түсті.
Осылайша, «Берел» қатарынан сегізінші кездесуінде қарсыластарын қапы қалдырды.
Өскемендіктер турнир кестесінде жеңіс саны (19, ұпайы – 54) жөнінен алда тұр. Ал «Жетісу» 18 ұтыстан кейін (Талдықорған) 56 ұпай жинады.
«Қуаныш» (СҚО) өз алаңында «Грация KZ» (Орал) клубын 3:0 (25:14, 25:20, 25:5) есебімен тізе бүктіріп, 46 ұпаймен үздік үштікті түйіндеп тұр.
Дүйсенбі күні үшінші турдың орталық кездесуі «Берел» мен «Жетісу» командалары арасында өтеді. 9 желтоқсанда өскемендіктер талдықорғандықтарға 1:3 есебімен жол берген еді. Сол ойында кеткен есені қайтара ала ма, оны алдағы бәсеке көрсетеді.
Еске сала кетейік, бұдан бұрын «Тұранның» қатарынан бес кездесуін жеңіспен түйіндегенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).