ТАЛДЫҚОРҒАН. KAZINFORM – Талдықорған қаласында волейболдан ерлердің ұлттық лига командалары арасында Қазақстан чемпионатының үшінші турында «Павлодар» мен «Есіл» өзара мықтыны анықтады.
Сергей Грибов жаттықтыратын павлодарлықтар өткен жылы күміс жүлдегер атанған еді.
«Павлодар» бұдан бұрын солтүстікқазақстандық клубты екі рет 3:1 есебімен тізе бүктірген болатын. Бұл жолы да сол есеп қайталанды – 3:1 (25:20, 23:25, 25:19, 25:14).
Осы ойыннан кейін павлодарлықтар 31 ұпаймен төртінші орынға көтерілді.
«Жетісу» өз алаңында көш соңындағы «Ұшқын-Көкшетаудың» 3:0 (25:17, 25:18, 25:16) есебімен меселін қайырып, 34 ұпаймен бұрынғыша үздік үштікті түйіндеп тұр.
Сәрсенбі, үшінші турдың соңғы күні «Буревестник» - «Атырау», «Павлодар» - «Ұшқын-Көкшетау», «Тараз» - «Есіл», «Жетісу» - «Ақтөбе» командалары кездеседі.
Көш басында келе жатқан Оралдың «Жайығы» үшінші турды аяқтады. Осы турдың қорытындысы бойынша батысқазақстандық клубтан Борис Кемпа үздік деп танылды.
Еске сала кетейік, бұдан бұрын Оралдың «Жайығы» 15 кездесуден кейін жеңіліс тапқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).