АСТАНА. KAZINFORM – Волейболдан әйелдер клубтары арасында Мальдив аралдарының астанасы Мале қаласында Орталық Азия чемпиондар лигасының ойындары аяқталды.
Түркістанның «Тұран» командасы финалға дейін сүрінбей жетті.
Асқар Шалқыбековтің шәкірттері жартылай финалда Непалдың «Непал Полис» командасын 3:0 (25:14, 25:13, 25:11) есебімен ойсырата жеңді. Алайда түркістандықтар шешуші бәсекеде Иранның «Фулад» клубына есе жіберді – 0:3 (22:25, 20:25, 20:25).
Осылайша, «Тұран» алғаш рет өткізілген Орталық Азия чемпиондар лигасында күміс жүлдені қанағат тұтты. Ал ирандық клуб Азия чемпиондар лигасына жолдама алды.
Еске сала кетейік, бұдан бұрын волейболдан «Тұранның» Орталық Азия чемпиондар лигасының жартылай финалына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).