АСТАНА. KAZINFORM — Қытайдың Тяньцзинь қаласында 21-30 тамызда әйелдер командалары арасында өтетін Азия чемпионатының жеребесі тартылды.
Қазақстан волейбол федерациясынан мәлім еткеніндей, Асқар Шалқыбеков жаттықтыратын қазақстандықтар В тобында Таиланд, Индонезия және Аустралия командаларымен ойнайды.
А тобында Қытай, Қытайлық Тайбэй, Иран және Ирак құрамалары сынға түседі.
С тобында Жапония, Вьетнам, Оңтүстік Корея және Гонконг командалары мықтыны анықтайды.
Регламентке сәйкес сегіз үздік құрама ширек финалға жолдама алады. Бұл ретте жеңіс, ұпай саны, содан кейін партиялардағы доп айырмасы ескеріледі.
Бұдан үш жыл бұрын Азия чемпионатында Қазақстан құрамасы бесінше орынға ие болған еді.
Еске сала кетейік, бұдан бұрын волейболдан Орталық Азия чемпионатында Непалды ұтқан Қазақстан бесінші орынды қанағат тұтқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).