АСТАНА. KAZINFORM — Тайландта волейболдан әйелдер командалары арасындағы Азия чемпиондар лигасында Талдықорғанның «Жетісуы» жартылай финалдық кездесуін өткізді.
Биыл оныншы рет Қазақстан чемпионы атанған талдықорғандықтар жапониялық «НЕК Ред Рокетс» клубымен финал жолдамасын сарапқа салды.
Алғашқы екі партияда жапониялық волейболшылар басымдылық танытты — 25:18, 25:20.
Үшінші сетте Марко Гршичтің шәкірттері есе қайырды — 26:24. Алайда ізінше жапониялық клуб матчты жеңіспен түйіндеді — 25:22. Қорытынды есеп — 3:1.
Жапониялықтар эйс жасаудан үздік болса, қазақстандықтар тосқауыл қоюдан жақсы нәтиже көрсетті.
Осылайша, «НЕК Ред Рокетс» клубы финалға шықса, «Жетісу» қола жүлде үшін таласатын болды. Талдықорғандықтардың қарсыласы кейін анықталады.
Сөйтіп, «Жетісу» өткен жылғы чемпиондық атағын қорғай алмады.
Еске сала кетейік, бұдан бұрын волейболдан «Жетісу» клубының Азия чемпиондар лигасының жартылай финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).