АҚТӨБЕ. KAZINFORM – Ақтөбе қаласында волейболдан ерлердің Ұлттық лига командалары арасында ХХХІІ Қазақстан чемпионаты төртінші турының ойындары мәресіне жетті.
Төртінші турдың соңғы күні «Атырау» «Есілден» (СҚО) 3:0 есебімен басым түссе, «Буревестник» (Алматы) «Ұшқын-Көкшетауды» тізе бүктірді – 3:0.
Ел чемпионы «Павлодар» Оралдың «Жайығын» 3:1 есебімен қапы қалдырды. Ал «Ақтөбе» «Жетісу жастарынан» айласын асырды – 3:0.
Осыайша, төрт турдың қорытындысы бойынша плей-офф бәсекесіне шыққан командалар анықталды. Турнир кестесінде 63 ұпаймен жеке-дара көш бастаған павлодарлықтар плей-офф кезеңінде 8-орындағы команда – «Жетісу жастарымен» шеберлік байқасады.
Екінші сатыдағы «Тараздың» қарсыласы «Ақтөбе» болса, «Жайық» Ақтөбеде өткен соңғы турда жақсы ойын өрнегін көрсеткен «Атыраудан» өтуге тырысады. «Есіл» «Буревестникпен» сынға түседі. «Ұшқын-Көкшетау» ғана плей-офтан тыс қалды.
Плей-офф бәсекелері Павлодар қаласында өтеді.
Еске сала кетейік, волейболдан Қазақстан чемпионатында «Павлодардың» «Ақтөбеден» айласын асырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).