ОРАЛ. KAZINFORM – Орал қаласында өтіп жатқан волейболдан ерлердің Ұлттық лига командалары арасында ХХХІІ Қазақстан чемпионатының үшінші турында жергілікті «Жайық» «Павлодармен» кездесті.
Осыған дейін оралдықтар (бас бапкері Виктор Козик) Игорь Никольченко жаттықтыратын ел чемпионы «Павлодарға» 1:3 есебімен жол берген еді.
Бұл ойын екінші турдан кейінге қалдырылып, Оралда өткен болатын.
Бүгін екінші матч та тартысты өтіп, павлодарлықтар 3:1 (22:25, 26:24, 25:20, 29:27) есебімен жеңіске жетті.
Осылайша, ұпай санын 44-ке жеткізген «Павлодар» клубы турнир кестесінде екінші орындағы «Жайық» пен «Тараздан» (бұл екі командада 30 ұпайдан бар) едәуір ұзап кетті.
«Атырауды» 3:1 (25:23, 26:28, 25:16, 25:23) есебімен тізе бүктірген «Есілдің» (СҚО) еншісінде 27 ұпай бар.
«Ұшқын-Көкшетауды» 3:0 (26:24, 25:21, 25:23) есебімен ұтқан «Буревестник» (Алматы) 24 ұпаймен бесінші орында келеді.
«Жетісу жастарын» 3:1 (23:25, 25:21, 26:24, 25:18) есебімен сүріндірген «Ақтөбе» алтыншы сатыда тұр.
Еске сала кетейік, бұдан бұрын волейболдан Қазақстан чемпионатында «Есілдің» көш соңындағы командаға есе жібергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).