Волейболдан ерлердің Ұлттық лига командалары арасында ХХХІІ Қазақстан чемпионатында Оралдың «Жайығы» екінші орынға көтерілді, деп хабарлайды Kazinform.
Оралдағы «Орал» спорт кешенінде өтіп жатқан үшінші тур ойындарында Виктор Козик жаттықтыратын батысқазақстандықтар «Ұшқын-Көкшетау» командасынан 3:0 (25:17, 25:23, 25:18) есебімен басым түсті.
Бұған дейін екінші сатыда келе жатқан «Тараз» тартысты матчта «Есілге» (СҚО) есе жіберді – 2:3 (25:27, 21:25, 25:23, 25:22, 11:15).
Осылайша, «Жайық» пен «Тараз» 27 ұпайдан жинап, доп айырмашылығы бойынша оралдықтар екінші сатыға шықты.
«Ақтөбені» 3:0 (25:23, 25:22, 25:19) есебімен тізе бүктірген «Павлодар» 35 ұпаймен бұрынғыша көш бастап келеді.
«Буревестник» (Алматы) «Жетісу жастарын» 3:0 (27:25, 25:23, 25:19) есебімен қапы қалдырды. 20 ұпайы бар солтүстікқазақстандықтар үздік төрттікке кірсе, алматылықтар (16 ұпай) бесінші орында тұр.
Үшінші тур бәсекелері одан әрі жалғасып жатыр.
Еске сала кетейік, бұдан бұрын Оралда волейболдан ерлер арасында Ұлттық ойындары өтіп жатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).