ӨСКЕМЕН. KAZINFORM – Өскемен қаласында волейболдан әйелдердің ұлттық лига командалары арасында өтіп жатқан Қазақстан чемпионатында «Жетісу» (Талдықорған) клубы көш басына шықты.
Сербиялық маман Марко Гршич жаттықтыратын талдықорғандықтар жұма күні көш соңындағы «Ертісті» (Павлодар) 3:0 (25:12, 25:6, 25:8) есебімен ойсырата жеңді.
«Жетісу» 28 ұпаймен бірінші орында тұр. Бірақ оны бір ойыны кем «Берел» (Өскемен) қуып жете алады.
Оралдың «Грация KZ» командасын 3:0 (25:21, 25:13, 25:17) есебімен тізе бүктірген «Қуаныш» (СҚО) 24 ұпаймен үшінші сатыда келеді.
«Ақтөбені» 3:0 (25:21, 25:22, 25:17) есебімен ұтқан «Қарағанды» 21 ұпаймен төртінші орынға орнықты.
Осыған дейін екі рет қатарынан жеңілген ел чемпионы «Тұран» (Түркістан) бұл жолы «Алматыны» 3:1 (25:21, 23:25, 25:14, 25:17) есебімен қапы қалдырды. Түркістандықтар 17 ұпаймен бесінші сатыда келеді.
Сенбі күні «Алматы» - «Ақтөбе», «Ару-Астана» - «Тұран», «Ертіс» - «Қарағанды», «Жетісу» - «Қуаныш», «Грация KZ» - «Берел» командалары өзара ойнайды.
Еске сала кетейік, бұдан бұрын «Тұранның» екінші рет қатарынан жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).