АСТАНА. KAZINFORM – Вьетнам астанасы Ханой қаласында волейболдан әйелдер құрамалары арасында өтіп жатқан AVC Ұлттар кубогында Қазақстан жартылай финалда алаң иелерімен шеберлік байқасты.
Өткен жылы осы жарыстың финалында қазақстандықтарды тізе бүктірген Вьетнам чемпион болған еді.
Бұл жолы жартылай финалда алғашқы партияда вьетнамдықтар 25:15 есебімен басым түсті. Екіншісінде Ришат Гилязутдиновтің шәкірттері есе қайырды – 25:17. Бірақ одан әріге шамасы жетпеді – 7:25, 16:25. Вьетнам қорытынды есепті 3:1-ге жеткізіп, табандылық танытты.
Осылайша алаң иелері финалға жолдама алса, қазақстандықтар қола жүлде үшін таласады. Қазақстан құрамасының қарсыласы Қытайлық Тайбэй мен Филиппин ойынынан кейін анықталады.
Еске сала кетейік, бұдан бұрын волейболдан Ұлттар кубогында Қазақстан жартылай финалда Вьетнаммен ойнайтынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).