АСТАНА. KAZINFORM – Өскемен қаласында волейболдан ұлттық лиганың әйелдер командалары арасында өтіп жатқан кіші тур аясында Қазақстанның суперкубок иегері анықталды.
Суперкубокты Қазақстанның тоғыз дүркін чемпионы «Жетісу» (Талдықорған) мен биылғы ел кубогының иегері «Тұран» (Түркістан) командасы сарапқа салды.
Талдықорғандықтарды соңғы жылдары сербиялық маман Марко Гршич жаттықтырса, түркістандық қыздарды Асқар Шалқыбеков баптап келеді.
Бұл жолы «Жетісу» 3:0 (25:22, 25:22, 25:17) есебімен жеңіске жетті.
Осылайша, талдықорғандық клуб бесінші рет суперкубок иегері атанды. Бұған дейін «Жетісу» 2015, 2018, 2019, 2024 жылдары суперкубокті ұтып алған еді.
Қазақстан чемпионатында да «Жетісу» көш бастаса, «Қуаныш» (СҚО) екінші, Өскеменнің «Берелі» үшінші сатыда тұр. Биылғы маусымда түркістандықтар да жүлделі орындардан дәмелі екендігін байқатты.
Еске сала кетейік, бұдан бұрын волейболдан Орталық Азия чемпиондар лигасында «Тұранның» ел намысын қорғайтынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).