АСТАНА. KAZINFORM — Қазақстанның екінші, әлемнің 82-ракеткасы Юлия Путинцева Яссы (Румыния) WTA 250 турнирінің 1/8 финалына шықты.
Жарыстың 9-ракеткасы болып тіркелген қазақстандық теннисші алғашқы айналымда рейтингіде 111-орындағы америкалық Клэр Льюмен бетпе-бет келді.
Тартысты өткен бірінші партия соңында Юлия сегізінші сетболын пайдаланды — 7:5.
Екінші сетті Путинцева сәтті бастады — 2:0. Содан кейін есепті 5:1-ге жеткізді. Ақыры матчқа доп бергенде, мүмкіндігін мүлт жіберген жоқ — 6:2.
Екі сағат 7 минутқа созылған тартысты бәсекеде Путинцева 1 эйспен бірге 21 брейк-пойнттың жетеуін өз есебіне жазды. Америкалық спортшы 4 брейкпен (8 брейк-пойнт) ерекшеленді.
Юлия Путинцева ширек финалға шығу үшін әлемнің 118-ракеткасы, армениялық, бұрынғы ресейлік Алина Чараевамен таласады.
Өткен жылы Ю.Путинцева аталмыш додаға қатыспаған еді. Сондықтан биыл сәтті өнер көрсетсе, рейтингілік ұпай қорын толықтыра алады.
Еске сала кетейік, бұдан бұрын Соня Жиенбаеваның әлемдік рейтингіде 26 сатыға жоғарылағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).