АСТАНА. KAZINFORM — Қазақстанның екінші, әлемнің 84-ракеткасы Юлия Путинцева Бостад (Швеция) WTA 125 турнирінің ширек финалына жолдама алды.
Доданың үшінші ракеткасы болып тіркелген қазақстандық теннисші екінші айналымда рейтингіде 148-орындағы сербиялық Лола Радивоевичті сынап көрді.
Бұл қос теннисшінің өзара алғашқы кездесуі еді.
Бірінші партияда Путинцева 6:4 есебімен басым түсті. Ол екінші сетті де өз есебіне жазды – 7:5.
Екі сағат 5 минутқа созылған тартысты бәсекеде Ю.Путинцева 1 эйспен бірге 17 брейк-пойнттың бесеуін пайдаланды. Радивоевич 3 эйс, 3 брейкпен (6 брейк-пойнт) ерекшеленді.
Юлия Путинцева жартылай финалға шығу үшін әлемнің 93-ракеткасы, аустриялық Синья Крауспен таласады.
Еске сала кетейік, бұдан бұрын Уимблдон турнирінде қарсыласын ойсырата ұтқан Заңғар Нұрланұлының үшінші айналымға шыққанын жазған едік.
Сондай-ақ Соня Жиенбаева Португалиядағы жарыстың ширек финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).