АСТАНА. KAZINFORM – Қазақстандық теннисші, 17 жастағы Заңғар Нұрланұлы Аустралияның Тралалгон қаласында жасөспірімдер арасында өтіп жатқан J300 турнирінде тарихи нәтижеге қол жеткізді.
Жасөспірімдер арасында әлемдік рейтингіде 12-орында тұрған, осы жарыстың 6-ракеткасы болып тіркелген Заңғар Нұрланұлы алдымен ресейлік Марат Салбиевті ойсырата ұтты – 6:0, 6:3.
Содан кейін германиялық Оливер Маджанжиктен айласын асырды – 6:4, 6:1.
Заңғар үшінші айналымда жасөспірімдер арасында әлемнің 21-ракеткасы, америкалық Гавин Гудты қапы қалдырды – 7:6 (7:5), 6:1.
Осылайша, Заңғар Нұрланұлы қазақстандықтар арасынан алғаш рет аталмыш доданың ширек финалына шықты.
Қазақстандық жас спортшы жартылай финалға шығу үшін жасөспірімдер арасында әлемнің 5-ракеткасы, бразилиялық Луис Гуто Мигуэлмен таласады.
Тралалгон жарысы жасөспірімдер арасында Аустралия ашық чемпионаты қарсаңында өтіп жатыр.
Еске сала кетейік, бұдан бұрын Аустралия ашық чемпионатында Юлия Путинцеваның сенсация жасап, жеңіске жеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).