НҰР-СҰЛТАН. ҚазАқпарат – Қазақстандық Зарина Дияс жұптық сында Уимблдон турнирін өте сәтті бастады, деп хабарлайды ҚазАқпарат тілшісі.
Зарина Дияс аустралиялық Арина Родионовамен бірге бірінші кездесуін осы доданың 2-ракеткалары, мажарстандық Тимея Бабош – франциялық Кристина Младеноввичпен өткізді.
2018 жылдан бері Т.Бабош пен К.Младенович жұптық сында «Үлкен дулыға» жарысының төрт дүркін чемпионы атанған болатын.
Қазақстандық-аустралиялық жұп атақты қарсыластарын 6:1, 6:2 есебімен ойсырата ұтты.
Бір сағат 13 минутқа созылған матчта З.Дияс пен А.Родионова бір эйс жасап, бес брейкке қол жеткізді.
З.Дияс пен А.Родионова екінші айналымда ресейлік Варвара Грачева – грузиялық Оксана Калашникова немесе ұлыбританиялықтар Нэйкта Бэйнс – Саманта Маррей жұптарының қай жеңгенімен шеберлік байқасады.
Еске сала кетейік, бұдан бұрын Александр Бубликтің алғаш рет Уимблдон турнирінің екінші айналымына шыққанын, Елена Рыбакинаның үшінші айналымға өткенін жазған болатынбыз.
Әйтсе де Юлия Путинцева үшінші айналымға шыға алмады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).